Монгол Улсын Хөдөлмөрийн яамны харьяа Төв аймгийн Эрдэнэ сумын “Эрдэнэ” МСҮТ-д нийт 500-аад оюутнууд суралцдагаас 370 гаруй нь БЗД-ийн залуучууд байна.
Тиймээс тус МСҮТ-өөс дүүргийн удирдлагуудыг урьж “Баянзүрх-Дотно зүрх” өдөрлөгийг зохион байгууллаа. Энэхүү өдөрлөгт ИТХ-ын дарга Ц.Батхүү, ЗДТГ-ын Хөдөлмөр эрхлэлт, нийгмийн хөгжлийн асуудал хариуцсан Засаг даргын орлогч Т.Баясах, Хөдөлмөрийн хэлтсийн мэргэжилтнүүд болон 28 хорооны Засаг дарга нар оролцож, дүүргийн оюутнуудтайгаа уулзсан юм.
Дүүргийн удирдлагууд “Эрдэнэ” МСҮТ-д суралцахдаа мэдлэг, чадвар, авьяасаараа манлайлж байгаа оюутан, залуучуудаа урамшуулж, шагнасан бөгөөд оюутан У.Мөнх-Эрдэнэ, Л.Гантуяа, Х.Амарбаясгалан нар дүүргийн ИТХ-ын даргын өргөмжлөл, мөнгөн шагналаар шагнагдлаа. Цаашид хамтран ажиллах гэрээг үзэглэснээр 28 хорооны Засаг дарга бүр “Эрдэнэ” МСҮТ-ийн нэг багштай хамтран ажиллахаар боллоо. Сургалтын чанар, үйлдвэрлэлийн дадлагаараа тэргүүлэгч тус төвд дүүргээс суралцагч оюутнуудын тоог нэмэгдүүлэхэд энэ гэрээний зорилго оршиж байгаа юм.