Халхын голын ялалтын 75 жилийн ой эдгээр өдрүүдэд тохиож байна. Өнөөдөр Баянзүрх дүүргийн 3 дугаар хорооны иргэн О.Жигжидсүрэн Монгол Улсын ерөнхийлөгч Ц.Элбэгдоржийн зарлигаар Хөдөлмөрийн гавьяаны улаан тугийн одонгоор шагнагдлаа. Түүний одонг дүүргийн Иргэдийн Төлөөлөгчдийн Хурлын Тэргүүлэгчдийн нарийн бичгийн дарга Ч.Мэндсайхан гардуулан өгч, баяр хүргэсэн юм. Халхын голын дайнд 20-хон настай залуу явахдаа 8 дугаар морьт дивизийн хуягтын жолооч, 23 дугаар морьт хороонд буудагч байжээ. О.Жигжидсүрэн гуай 95 насандаа энэ эрхэм одонг энгэртээ гялалзуулсандаа сэтгэл өндөр байж, хамт тулалдаж явсан журмын нөхдөө дурсаж байсан юм.